भरे-भराये फारम कर दये रद्द

जिला महोबा, ब्लाक कबरई, कस्बा खन्ना। एते की सैकड़न ओरतन ने जुलाई 2014 में समाजवादी पेंशन के फारम भरे हते। जीमे पचासन ओरतन खे फारम प्रधान ने रद्द कर दये हें। जीखी दरखास 23 सितम्बर खा डी.एम वीरेश्वर सिंह खा दरखास दई हे।
दुलारी, प्रेमरानी, ममता ओर शारा ने बताओ कि हमने पचास रुपइया को फारम खरीद के समाजवादी पेंशन को फारम भरो हतो। हमाये न जमीन हे ओर न एकऊ पक्के घर हें। मजदूरी करके आपन परिवार पालत हें। छितियां, मुलिया, गोरी ओर राजदुलारी ने बताओ कि पेहलेे हमने जो फारम भरे हते, ऊ गलत होय से दुबारा हमने फारम खरीदे हते। ऊ भी लेखपाल ओर प्रधान ने लौटा दये हंे। 23 सितम्बर खा डी.एम. वीरेश्वर सिंह खा दरखास देके जांच कराये की मांग करी हे। प्रधान राजबहादुर सिंह ने बतायो कि कस्बा कि आबादी पांच हजार हे। जी मे 719 फारम भरे हे। लगभग 580 पास हो गए हे। जीखे मोटरसाइकिल ओर जमीन हे,ऊखे फारम रद्द कर दये हे। फारम हमे महोबा से मिले हते। जीखी फोटो कापी करा के आदमियन खा दये हते। रजिस्ट्रार कानूनगो कालूराम अहिरवार बताउत हें कि लेखपालन की हड़ताल चलत हे। एईसे अभे जांच नई हो पाई हे