ब्लाक मा कमिश्नर कराइन शपथ ग्रहण

जिला बांदा, ब्लाक महुआ। 20 दिसंबर का महुआ ब्लाक के तहत आवैं वाले छियत्तर गांव के प्रधान अउर वार्ड सदस्य का शपथ ग्रहण कमिश्नर कराइन। अब 26 दिसंबर का गांवन मा प्रधान नई पंचवर्षीय के पहली मीटिंग करिहैं।
कमिशनर वेकेटेश्वर लू प्रधान अउर वार्ड सदस्यन का सम्बोधित करत कहिन कि गरीबन के सेवा करैं मा ही मेवा है। सबसे सामान व्यवहार राखैं। चुनाव के दौरान मा लड़ाई झगड़ा का भुला के गांव मा ज्यादा सें ज्यादा विकास का काम करावैं। सी.डी.ओ. कहिन कि मनरेगा मा रूपिया के कमी निहाय। जेतना ज्यादा से ज्यादा खर्च करैं चाहैं तौ खर्च कई सकत हैं। मनरेगा अउर विकास के काम मा रूपिया के कमी न अई।
बरसड़ा खुर्द प्रधान शैलकुमारी, नौहाई के प्यारी अउर बहेरी के श्यामकली का कहब है कि उंई विकास का काम खुब करिहैं। जेहिसे जनता उनका दुबारा प्रधान बनै का मौका दई सकै।
यहिनतान नरैनी ब्लाक के तहत आवैं वाले तिरासी गांव के प्रधान अउर वार्ड सदस्यन का शपथ ग्रहण जिला समाज कल्याण अधिकारी कराइन। अब 26 दिसंबर का गांवन मा प्रधान पहली मीटिंग करिहैं।
समाज कल्याण अधिकारी प्रधान अउर सदस्यन का सम्बोधित करत कहिन कि सत्य अउर निसठा के साथै काम करैं। आप के ब्लाक मा तौ बी.डी.ओ. मुख्यालै मा ही रहत हैं। कउनौ भी काम होय तौ तुरतैं बता सकत हैं।
बी.डी.ओ. रामकिशन प्रधानन से कहिन कि गांवन मा कउनौ भी भूखा अउर लाचार होय तौ वहिके मद्द करैं। उनके खाता मा एक हजार रूपिया है। मनरेगा का काम दुई दिन मा शुरू होइ जाय काहे से या साल सूखा परा है। गांवन मा जउन भी पंशन धारकन के खाता संख्या गलत हैं, तौ उनका सही करावैं।