नथिया
जिला चित्रकूट, ब्लाक मानिकपुर, गांव ब्यूर। हिंया के नथिया दस बरस से वृद्धा पेंशन खातिर परेशान हवै। वृद्ध पेंशन खातिर कइयौ दरकी प्रधान जगमोहन से कहा गा, पै वा ध्यान नहीं देत आय।
प्रधान जगमोहन का कहब हवै कि नथिया से फोटो अउर फार्म मांगे रहौं, पै वा नहीं दिहिस आय। फोटो अउर फार्म भरके दे तौ समाज कल्याण विभाग मा फार्म जमा कइ देहूं।
गांव के नथिया का कहब हवै कि पांच बिटिया रहैं। उनके शादी कइ दीने हौं। लड़का एकौ नहीं आय। आठ महीना पहिले मनसवा नत्थू मरगा रहै। यहै से कमाये वाला कउनौ नहीं आय। या कारन सोचत हौं कि वृद्धा पेंशन मिलै लागै तौ थोइ नून रोटी चलै लागै। काहे से कि बुढ़ापे मा मजूरी भी नहीं कीन होत आय। वृद्धा पेंशन खातिर कइयौ दरकी प्रधान जगमोहन से कहे हौं, पै वा सुनत नहीं आय।
