ट्रांस्फारमर देत मोत खा न्योता
जिला महोबा, ब्लाक पनवाड़ी, कस्बा पनवाड़ी। मुल्लनपुरा वार्ड नम्बर दो में लगभग पचास साल से बिना जाली को ट्रांस्फारमर धरो हे। जीसे आये दिन कछू न कछू घटना होत रहत हे।
एते के रहे वाले पप्पू, ओमप्रकाश वार्ड मेम्बर इमामी खान ओर इमरान ने बताओ कि पचास साल हो गये हे जभे से एते बिजली लगी हे। तभे से बिना जाली को ट्रांस्फारमर धरो हे। एते लगभग सौ घर ओर तीस दुकाने हें। जीखा बोहतई परेशानी आउत हे। एतई पे घूरो हे जीमें जानवर बेठे खेे लाने आउत हें तो ओतई चिपक जात हे ट्रांस्फारमर के नीचे पानी भरो रहत हे तो बरसात के महीना में करेन्ट तक उतर आउत हे। डेरन खे मारे ओते से कोनऊ निकरत नइयां। अभे पिछले साल एक भैंस चिपक के मर गई हती, ओर पन्द्रह दिन पेहले एक गाय करेन्ट से मर गई हे। अगर ई ट्रांस्फारमर में जाली लग जाये तो बोहतई नींक हो जेहे। कम से कम जानवरन की जान तो बचहे।
पनवाड़ी बिजली विभाग के जेई दिनेश मौर्या ने बताओ के ओते आदमी कूड़ा डारत हे। एई से ओते जाली बनवाये खे जगह नइयां, पे कूड़ा हटवा खे जल्दी जाली बनवाये खे कोशिश करी जेहे।