बिजली लगवावैं खातिर दिहिन दरखास

जिला चित्रकूट, ब्लाक कर्वी, कस्बा शिवरामपुर, लैना बाबा, दलित बस्ती। हिंया लगभग डेढ़ सौ घर हवैं। इं घरन मा लगभग पचास बरस से बिजली नहीं लाग हवै। बिजली लगवावैं खातिर प्रधान शिवबरन कपडि़या से एक बरस पहिले कहा गा तौ कहत रहै कि सांसद का चुनाव होय के बाद बिजली लागी, पै अबै तक बिजली नहीं लाग। यहै से प्रधान के साथै कर्वी एस.डी.एम. नरेन्द्र सिंह का लिखित दरखास 9 सितम्बर 2014 का दीन गे।
बस्ती के मंटोरिया, गुलरिया राजरानी, तुलसा अउर सुनीता का कहब हवै कि बस्ती मा अंधियार रहत हवै। यहै से मिट्टी का तेल बाजार से खरीद के डिब्बी जलाइत हन। बिजली नहीं आय यहै से कूलर पंखा नहीं खरीद सकित हन। बच्चा भी नींक से पढ़ नहीं पावत हवै। मोबाइल चार्ज करावैं खातिर शिवरामपुर एक किलो मीटर दूर जाये का परत हवै। बिजली लाग जाये तौ इं समस्या से न जूझै का परै। यहिके खातिर प्रधान शिवबरन कपडि़या भरोसा देत हवै कि बिजली लगवाई जई, पै अबै तक बिजली नहीं लाग। यहै से प्रधान का अपने साथै लइके कर्वी एस.डी.एम. नरेन्द्र सिंह का लिखित दरखास दीने हन।
प्रधान शिवबरन कपडि़या कहिस कि बिजली लगवावैं खातिर बिजली विभाग मा मई 2014 का कहा गा रहै तौ विभाग वाले कहत रहैं कि सांसद का चुनाव होय के बाद बिजली लगाई जई, पै चुनाव होय के बाद अबै तक बिजली नहीं लगाई गे। यहै से बस्ती के मड़इन का लइके कर्वी एस.डी.एम. नरेन्द्र सिंह का 9 सितम्बर 2014 का लिखित दरखास दीन गे। कर्वी एस.डी.एम. नरेन्द्र सिंह कहिन कि बिजली लगवावैं खातिर बिजली विभाग मा कहा जई।