बिगरो परो हैण्डपम्प

कभे सुधरहे हैण्डपम्प

महोबा, ब्लाक पनवाड़ी, गांव परापातर। ई गांव के वार्ड नम्बर पांच में लगभग दो साल से हैण्डपम्प बिगरो परो हे। जीखे बनवायें की कोनऊ सुनवाई नइयां।
गांव के राममूर्ती, भागवती, विमला ओर मालती ने बताओ कि हमाये मोहल्ला में दो साल पेहले दो हैण्डपम्प लगे हते। एक हैण्डपम्प लगभग दो साल से बिगरो परो हे। जीसे हमे पानी भरे मंे बोहतई परेशानी होत हे। काय से एक हैण्डपम्प हे। पानी के बिना कोनऊ काम भी नई हो सकत हे। जीसे पानी भरे खा लाइन लगाने परत हे। पानी भरे में कभऊं-कभऊं लड़ाई भी हो जात हे। अगर जा हैण्डपम्प बन जाये तो पानी भरे खा नींक हो जेहे। ईखे लाने हमने केऊ दइयां प्रधान से कहो हे कि हैण्डपम्प बनवा देय, पे हम गरीबन की कोनऊ सुनवाई नई होत आय।
प्रधान दृगपाल ने बताओ कि ऊ हैण्डपम्प रिबोर कराये खे परो हे। ऊखे बदले दूसरो हैण्डपम्प लगवा दओ हे। ओते पानी की कोनऊ परेशानी नइयां। आदमी झूठ बोलत हें।