बिगरें हैण्डपम्प, पानी खे परेशानी

जिला महोबा, ब्लाक कबरई, गांव मवईखुर्द। एते ई गांव के नई बस्ती मेंलगो हैण्डपम्प दो महिना से खराब हे। जीसे आदमी पिये के पानी खा एते ओत भटकत हे।
रामबाबू, जगमोहन, विनय यादव ओर प्रमोद खगार बताउत हे कि मोहल्ला में लगो हैण्डपम्प दो महिना से खराब हे। पानी के लाने ई ऊ मोहल्ला भटकत हें। भइयाजी ओर जीतू साहू कहत हे कि दूसरे मोहल्ला के हैण्डपम्प में भी भीड़ होत हे। लाइन लगाने परत हे। आदमी ओतई नहात रहत हे। पानी नई मिल पाउत हे। पानी के लाने मारपीट तक हो जात हे।
प्रधान स्वार्गीय मायादेवी को आदमी गोकरन बताउत हे कि ऊ हैंण्डपम्प के बारे में मोये कोनऊ जानकरी नइयां। अब भई हे तो जल्दीही बनवा दओ जेहे।
एसई ब्लाक जैतपुर गांव गुगौरा। एते के चन्द्रभान करनसिंह ओर भिम्मा बताउत हे कि एक महिना से हैण्डपम्प खराब हे। जीसे चार सौ आदमी पानी के लो परेशान हे। काय से गांव भीतर को पानी खाना हे। प्रधान से कहत हे तो ऊ रिबोर को बहाना कर देत हे। कछू नई करत हे। एई से 31 अगस्त खा तहसील में दरखास दई हे। जल निगम के जूनियर इन्जिनियर जीतेन्द्र बताउत हे कि रिबोर के लाने अभे तक कोनऊ दरखास नई आई हे। आहे तो रिबोर कराओ जेहे।