बहिन का जलावै कै आरोप

जिला अम्बेडकर नगर, ब्लाक अकबरपुर, गांव हरिपुर, जमुनीपुर। 2 सितम्बर का एक अट्ठाइस साल के मेहरारू कै आग से जरै के कारण मउत होइगै। भाई कै आरोप बाय कि दहेज के ताई जलाय के ससुराल वाले मारि डारिन।
गंाव के मनईन कै कहब बाय कि सुरेन्द्र कै मेहरारू सीमा सबेरे चूल्हा पै खाना बनावत रहिन। चूल्हा से निकरी चिनगारी उनके साड़ी मा पकर लिहिस। जेसे पूरी तरह झुलस गइन।
पति सुरेन्द्र कै कहब बाय कि जउने समय जलिन वहि समय हम धान कै सिंचाई करै गा रहेन। सूचना मिली तौ आयन जिला अस्पताल लै गयन। हालत नाजुक देखिके फैजाबाद ट्रामा सेन्टर रिफर कै दिहिन। इलाज के समय मउत होइगै।
रमेश कै आरोप बाय कि हमार बहिन जली नाय रही जबरदस्ती उनकै पति अउर परिवार वाले जलाय के मारि डारिन। सूचना मिली तौ हम बम्बई से आयन। अउर अकबरपुर मा पति सुरेन्द्र के खिलाफ तहरीर दिहन।
अकबरपुर थाना कोतवाली कै एस.ओ. योगेश शाह बताइन कि तहरीर मिली बाय। पोस्टमार्टम रिपोर्ट आये के बाद पता चले। खबर लिखा जाए तक पोस्टमार्टम रिपोर्ट नाय आय रही।