राठ तिगैला में लगो जाम
जिला महोबा, ब्लाक पनवाड़ी, कस्बा पनवाड़ी, राठ तिगैला। ई कस्बा में बस स्टैण्ड नइयां जीसे आये दिन जाम लग जात हे। एई से एते के आदमी बस स्टैण्ड बनवाए खे मांग करत हें।
रामसिंह, मुन्ना, मुकेश ओर भगवानदास ने बताओ के एते बस स्टैण्ड नई बनो आय। एते राठ रोड, महोबा रोड ओर हरपालपुर रोड हे। अगर तीनऊ जघा से बसें आ जात हें तो जाम लग जात हंे। जीखे कारन हमाये दुकानन तक छोट-छोट साधन ठाढ़ हो जात हें। जीखे कारन ग्राहक तक नई आ पाउत हें। एते कछू के लाने कोनऊ अधिकारी ध्यान नई देत हे। अगर एते स्टैण्ड बन जाये तो बोहतई नींक हो जाय। कम से कम बसें स्टैण्ड में तो ठाढ़ी होहें, ओर छोट साधन आसानी से निकर जेहें। एसई सन्तोष मैजिक ड्राइवर ने बताओ कि जब जाम लगत हे तो हमे अपनी गाड़ी निकारें में बोहतई परेशानी होत हे। हमखा रोज जाम में फंसने परत हे। चाहे जित्तो जरूरी काम काय न हो फिर आधा एक घन्टा से पेहले जाम नई खुलत आय।
परिवहन विभाग के वरिष्ठ केन्द्र प्रभारी शुनील शर्मा ने बताओ कि पनवाड़ी कस्बा खे लाने पूर्व भाजपा विधायक छोटेलाल ने बुन्देलखण्ड विकास नीधि से यात्रियन के रूके खे लाने रैन बसेरा बनायें खे लाने लगभग सत्तर लाख रूपइया आओ हतो, पे जघा न मिले के कारन ऊ भी नई बन पाओ हे। अगर पनवाड़ी में कहूं जमीन मिल जेहे तो बस स्टैंण्ड बनाये खा प्रस्ताव भेजो जेहे।