बस्ती बीच भरा कांदौ

चित्रकूट जिला के कस्बा मा नाली न बनी होय से मड़इन का गन्दगी का सामना करै का परत हवै।
ब्लाक कर्वी, गांव रानीपुर भट्ट, दुर्गादास का पुरवा। हिंया कुंआ अउर हैण्डपम्प के लगे पानी निकरै खातिर नाली नहीं बनी आय। नाली बनवावै खातिर पंचायत मित्र पुत्तन से 16 सितंबर का कहा गा, पै अबै नाली नहीं बनी आय।
पुरवा के फुलिया, सखिया अउर संतकुमार कहिन कि हैण्डपम्प से पानी भरित हन। नाली न बानी होय के कारन कांदौ भरा रहत हवै। वहै कांदौ हइल के पानी लइके निकरै का परत हवैं। कत्तौ कत्तौ तौ नहा के जात हवैं तौ कांदौ मा गिर जात हवैं। अगर हैण्डपम्प के लगे नाली बन जाये तौ इं सबै समस्या खतम होइ सकत हवैं।
पंचायत मित्र पुत्तन का कहब हवै कि नाली बनवावै खातिर ब्लाक से रुपिया नही आवा। यहिसे नाली नही बन पाई हवैं।
ब्लाक रामनगर ,कस्बा राजापुर वार्ड नम्बर सात। हिंया के रानी अउर राजू का कहब हवै कि नाली न बनी होय से मडइन के घरन के निस्तार का पानी पूर रास्ता मा भरार रहत हवैं। गंदे पानी मा मच्छर भी खूबै पनपत हवैं। यहिसे मलेरिया अउर डेंगु के बीमारी फइलै का डेर बना रहत हवै। यहिसे नाली बनवावै खातिर 14 सितंबर का टाउन एरिया वाले भरोसा दिहिन कि नाली बनवाई जई।
राजापुर टाउन एरिया के अधिशाषी अधिकारी हासिम अली का कहब हवै कि नाली बनवावै खातिर पास होइगे हवै। चुनाव के बाद नाली बनवा दीन जई।