बदौसा स्टेशन के बाहर दुकान मा पानी का पाउच खरीद बुझावत पियास
जिला बांदा, ब्लाक नरैनी, बदौसा स्टेशन मा एक महीना से पानी के भारी समस्या है। सफर करैं वाले यात्रिन का या उम्मीद नहीं रहत कि स्टेशन मा भी पानी न मिली।
गांव भुसासी का राजा कहिन कि या समय गर्मी का समय है। हर स्टेशन अउर कस्बा मा मड़ई पानी पियावत है, पै बदौसा स्टेशन मा पानी वाले घर मा ताला लाग रहत है। जबै मन भा तबै खोलत हैं। घड़ा भरे धरे रहत हैं। जेहिका देख के मड़ई पियास बुझावत है। ग्वालिन, सुखिया अउर राजा भइया बताइन कि दुई हैण्डपम्प अउर तीन सप्लाई वाले नल हैं। कउनौ एक महीना तौ कउनौ एक साल से खराब परे हैं। सिर्फ एक नल चलत है जबै तक मड़ई गाड़ी छोड़ के पानी भरै उतरत है तबै तक गाड़ी छूट जात है। यहिसे सबै यात्री पियासन लउट जात हैं। पौशाला मा जउन पानी पियावत है तौ एक घंटा मा एक डिब्बा पानी देत हंै।
बदौसा स्टेशन मास्टर मुशर्रफ इमाम का कहब है कि जब घड़ा भरे धरे हैं तौ हैण्डपम्प अउर सप्लाई नल बनवावैं के कउन जरूरत है। जहां घड़ा धरे हैं होंआ अगर ताला लाग है तौ खोलवा दीन जई।