ट्रांसफाॅर्मर
जिला सीतामढ़ी, प्रखण्ड रीगा, पंचायत बुलाकीपुर, गांव बुधवारा। उहां वार्ड नम्बर पंद्रह में स्कूल के सामने ट्रांसफाॅर्मर लगभग साल भर पहिले जल गेलई। जलला के कुछे दिन के बाद सात सौ कुछ रूपईया के बिल अलई। लेकिन आई तक कोई विभागिये लोग देखे भी न अलथिन।
उहां के महेश मुखिया, रामदेव मुखिया, हुलास मुखिया सब कहलथिन कि इहां ट्रांसफाॅर्मर लगभग तीन साल पहिले लगलई। जब साल भर के बाद चालू भेलई त दस से पंद्रह दिन जलला के बाद ट्रांसफाॅर्मर जल गेलई। जब हम सब चंदा लगा के चालू करबईली। उहो दस पंद्रह दिन जलला के बाद चोर खोल के ले जाये के कोशिश कलथिन लेकिन लोग जाग गेलई। जेई कारण उ बच गेलई। कल होके विभाग में सूचना देली त लोग आके ट्रांसफाॅर्मर पोल पर चढ़ा देलथिन। दु चार दिन जललई ओई के बाद ट्रांसफाॅर्मर जल गेलई। तहम सब विभाग में सूचना देली। लेकिन विभाग से कोई न आयल अउर न ट्रांसफाॅर्मर ही लागलक।
रीगा के बिजली विभाग के जुनियर इंजिनियर इकबाल अंसारी कहलथिन कि उहां ट्रांसफाॅर्मर जललई जेकर रिकाॅड हमरा पास हई। जब ट्रांसफाॅर्मर लगतई त जेतना दिन बिजली जलल हई ओतने दिन के बिल देवे के परतई। उहां ट्रांसफाॅर्मर सांसद फण्ड से लगावे के पास हो गेल हई।