प्राथमिक स्वास्थ्य केन्द्र मा सुविधा के कमी

जिला चित्रकूट, ब्लाक रामनगर, प्राथमिक स्वास्थ्य केन्द्र। हिंया बच्चा पैदा होय वाली औरतन खातिर नाश्ता, खाना के कउनौ व्यवस्था नहीं आय अउर इनतान के ठंडी मा उनका ओढ़ै खातिर कम्बल नहीं दीन जात हवैं। केन्द्र मा गंदगी भी हवै।
गांव घुरेहटा के सहविती कहिस कि 12 जनवरी का रामनगर प्राथमिक स्वास्थ्य केन्द्र बच्चा पैदा करावैं गई रहौं । केन्द्र मा नाश्ता, खाना अउर ओढ़ै खातिर कम्बल नहीं मिला हवै। केन्द्र मा पलंग के चादर भी रोजै नहीं बदली जात हवै। बांधी गांव के मंजू कहत हवै कि रामनगर प्राथमिक स्वास्थ्य केन्द्र मा बहुतै गंदगी रहत हवै। इनतान के ठंडी मा ओढ़ै का चादर दीन जात हवैं। यहै से औरतन का अपने घर से रजाई अउर कम्बल लावैं का परत हवैं।
रामनगर प्राथमिक स्वास्थ्य केन्द्र के प्रभारी नरेन्द्र कुरैचिया का कहब हवै कि बच्चा पैदा होय वाली औरतन का नाश्ता, खाना दीन जात हवैं। मड़ई यहिनतान कहत हवैं तौ का कीन जाये। कम्बल खातिर रिपोर्ट बना के नवम्बर के महीना मा लखनऊ भेजी गे रहै, पै अबै तक कम्बल नहीं आय हवैं ।