जिला महोबा, ब्लाक चरखारी, गांव पंचमपुरा। मे प्रधान छत्रपाल के घर में 1 मई 2016 की रात मे चोरी हो गई हती। ईखी रिपोर्ट चरखारी कोतवाली मे लिखाई हे। पुलिस जांच करत हे।
प्रधान छत्रपाल बताउत हे की घर में सब सोउत हते। तभई चोर घर मे घुस आये। हमने आवाज सुनी तो जाग गये। चोरन ने पता नई हमाये उपर का दओ। मुंह से आवाज नईं निकरी, जभे की हम खुद देखत हते। न हमने कोनउ खा पहचान पाओ हे। जभे चोर चोरी करके भाग गये तो हमाओ जक्का सो खूलो ओर हम जोर-जोर से चिल्लान लगे। मोहल्ला के आदमी इक्ट्ठा हो गये। ईखी सूचना हमने चरखारी कोतवाली मे दई हती। पुलिस भी जांच करन आई हती। चोरी में हमाओ बक्सा चलो गओ हे। बक्सा में पन्द्रह तोला सोना ओर पन्द्रह हजार नगद रूपइया धरो हतो। चोरी मे मोओ तीन लाख को जेवर ओर पन्द्रह हजार नगद गओ हे।
चरखारी कोतवाली को हेड कांस्टेबल मुहर्रार बताउत हे की 2 मई खा दरखास मिली हती। अभे तक मुकदमा नई लिखो हे। ईखी जांच चलत हे। काय से प्रधान ने कोनउ के नाम दरखास नई दई हे। जांच के बादई मुकदमा लिखो जेहे।
रिपोर्टर – सरोज सैनी