पकरे गये हत्या के आरोपी
जिला महोबा, ब्लाक चरखारी ओर जैतपुर। ई ब्लाक के अलग-अलग गांव में भई घटना खा पुलिस ने खुलासा करो हे। अपराधी के खिलाफ आई.पी.सी. की धारा लगा जेल भेज दओ हे।
ब्लाक चरखारी, गांव बम्हौरी कला। एते 2 फरवरी की रात में पचास साल के साहब सिंह पुत्र मंगल सिंह की खेत में सोउत समय हत्या हो गई हती। ईखी रिपोर्ट ऊखे भतीजे रामपाल ने गांव के ही चार आदमियन के नाम धारा 302 के तहत मुकदमा लिखाओ हतो। ईखी जांच कोतवाल मधुसूदन शुक्ला ने कर हती। जीखो खुलासा 6 फरवरी खा करो हे। जीमें खुद रामपाल ओर ऊखे दोस्त लाखन सिंह ने अपराधिक षड़न्त्र रचके गांव के ही सुरेन्द्र उर्फ बिज्जू से कहके नौ हजार रुपइया 315 बोर का तमंचा ओर कारतूस देके ओर शराब पिला के हत्या करवाई हती। महोबा अपर एस.पी डाक्टर रामयस सिंह बताउत हे की गांव में ही तीनऊ आदमियन खा चरखारी कोतवाली के कोतवाल मधूसूदन शुक्ला, उपनिरिक्षक रमेश कुमार पटेल, राधेबाबू, कमलेन्द्र सिंह ओर कास्टेंबल शिवआसरे त्रिवेदी, जीतेन्द्र सोनकर व शिवारमन ने पकरो हे। इनके पास एक अद्द 315 बोर के तमंचा ओर दो अद्द कारतूस मिले हते। तीनऊ के खिलाफ धारा 302(हत्या) 120(बी) (षड़यन्त्र रचना) आई.पी.सी. व 25(ए) एक्ट के तहत मुकदमा लिख जेल भेज दओ हे। खुलासा करें वाली टीम खा एस.पी. हरिशचन्दर ने पांच हजार रुपइया इनाम दओ हे।
एसई कुलपहाड़ कोतवाली की पुलिस ने 30 जनवरी खा थूरट गांव की रास्ता में रमेश यादव के साथे लूट भई हती। जीमें मोटर साइकिल, मोबइल ओर बाइस सौ रुपइया ले गये हे। ईखी दरखास कुलपहाड़ कोतवाली में दई हती।
कुलपहाड़ सी.ओ. धनंजय कुशवाहा कोलवाल सतीशचन्द्र शुक्ला ने पुलिस बल के साथे 8 फरवरी खा लूट को खुलासा करो हे। दीपू उर्फ प्रदीप ओर मंगल पुत्र रामेश्वर राजपूत खा पकर धारा 392 के तहत मुकदमा लिख जेल भेज दओ हे।