फोटो साभार विकिपीडिया
जिला महोबा, ब्लाक चरखारी, कस्बा खरेला। एते के संस्थान के कर्मचारियन की लापरवाही के कारन आधे कस्बा में लगभग एक महिना से पानी नई आउत हे। जीसे आदमी दो-दो किलोमीटर से पानी लाउत हे। जानवर ओर खुद के पिये खे लाने बूंद-बूंद पानी खा भटकत हें।
बृजकिशोर तिवारी, राकेश, रामदास कहत हे की हमाये कस्बा से एक महीना से पाइप लाइन में पानी नई आउत हे। तीनऊ मोहल्ला मे लगभग पांच सौ की आबादी होहे। हम लोग एक-एक बूंद पानी खा तरसत हे। रिंकू सोनी, शीलू सोनी ओर दीपक सोनी कहत हे की पानी के बिना कछू नई काम होत हे। आदमी एक लोटा में पेट भर जात हे। जानवरन खा दो-दो बाल्टी लगत हे। हैण्डपम्प मे पानी भरन जात हें तो एक घण्टा लाइन में ठाड़ होने परत हे। जीसे मजदूरी ओर अपने धन्धा भी समय से नईं कर पाउत हे।
चरखारी जल सस्थान के जे.ई कहत हे की अगर मेन रोड की पाइप खराब हे तो हम बनवा सकत हे अगर बस्ती की भीतर खराब हे तो खरेला के कर्मचारी सही करहें। जभे जिम्मेंदार कर्मचारी खा पता नइयां की समस्या किते हे तो जनता खे का पता।