नाला के सफाई होइ

जिला चित्रकूट, ब्लाक कर्वी, गांव परसौंजा। हिंया दुखइया नाम का नाला हवै। वा नाला के लगभग एक बरस से सफाई नहीं भे आय। या कारन नाला का गंदा पानी सड़क मा भरा रहत हवै। यहै से रोजै का हजारन मड़ई समस्या का झेलत हवैं। नाला के सफाई करवावैं खातिर प्रधान शिवदुलारी से कहा गा, पै कुछौ नहीं भा।
गांव के मुन्नीलाल, माताबदन अउर दिनेश समेत दस लोगन का कहब हवै कि दुखइया नाला कूड़ा से भरगा हवै। नाला के सफाई नहीं होत आय। मड़इन के घरन का गंदा पानी पूर रोड मा भरा रहत हवै। रोड से साधन निकरत हवै। या कारन गंदे पानी के छीटां मड़इन के ऊपर परत हवैं। यहै से उनके कपड़ा खराब होइ जात हवैं। अगर नाला के सफाई होइ जाये तौ हमार इं सबै समस्या खतम होइ सकत हवै।
प्रधान शिवदुलारी के मनसवा राजाराम का कहब हवै कि मड़ई खुदै नाला मा कूड़ा फेंकत हवैं। पन्द्रह दिन पहिले सफाई कर्मी का बोला के नाला के सफाई करवाये रहौं। अब मजूर मिल जइहैं तौ नाला के सफाई करवा दीन जई। काहे से कि नाला के सफाई करावैं का छह मजूर चाही अउर एक हफ्ता सफाई करैं मा लाग जई। जबै मजूर मिल जइहैं तौ नाला के सफाई करा दीन जई।