नाय बदला गै ट्रांसफार्मर

जिला अम्बेडकर नगर, ब्लाक कटेहरी। पूर्वी नाका पै लाग सौ केवी कै टांसफार्मर 16 अक्टूबर का धूं धूं कइके जरिगै। जेसे लगभग बारह सौ आवादी कै मनई अंधेरे मा बाटे।
बिजली उपभोक्ता रामप्रकाश यादव, गजराम अउर रवीन्द्र वर्मा बताइन की अचानक टांसफार्मर से लपक उठत देखिके आस पास कै मनई दौरिन। उपकेन्द्र से सौ मीटर दूर पै टांसफार्मर हुवय से उपकेन्द्र कै कर्मचारी भी पहुंच गइन। बिजली कटै के बाद आग बुझाइगै। केबिल अउर तार भी कुछ दूर तक जरिगै। लोड ज्यादा हुवय के कारण बार बार जरि जात रहा। टांसफार्मर कै क्षमता बढ़ावै कै मांग कीन जात रहा लकिन शासन प्रशासन से सुनवाई नाय भै रही। अगर टांसफार्मर कै क्षमता बढ़ायगै हुवत तौ शायद ई नौबत ना आवत।
अम्बेडकर नगर कै अधिशाषी अभियन्ता मुकेश बाबू कै कहब बाय कि टांसफार्मर बदलवावै कै प्रयास कीन जात बाय। दुई चार दिन मा बदल दीन जाये। 21 अक्टूबर तक नाय बदला गै रहा।