टुटा पुल
जिला सीतामढ़ी, प्रखण्ड सानेबरसा, गांव दलकावा। उहां मोर पर पइनी में पुल हई। उ पुल बारह साल पुराना हई जे दुनु तरफ से टूटल हई। जेई कारण बस, टेम्पु, मोटर साईकिल अउर आदमी सबके चले में बहुत परेशानी होई छई।
उहां के दुःखा माझी, विकास कुमार, रेखा देवी सब कहलथिन कि एतेक गहीर गड्ढा हई। जेइ पर पहिले पुल न रहलई, तब लचका से हमसब अबई जाईत रहली अब पुलो बनलई उहो दुनु तरफ से दु दु हाथ जगह छोड़ के पुल बनलई। यही कारण तुरंते दुनु तरफ से पुल धस गेलई। टेम्पू चालक नवीन कुमार, विजय राय सब कहलथिन कि जब हम सब पुल पार करइ छी त करेजे पर हाथ रहई छई। एक त पुल टूटल दोसर में सड़को ईटे के उहो टूटल लगइत रहई छई गाड़ी फेका गेल।
मुखिया कारो देवी के पति आयोधी पासवान कहलथिन कि हमसब प्रखण्ड के बैठक में जाई छी त यई बात के चर्चा करई छी कि नया पुल बनेके लेल। मगर बनतई तब न पिछला टेन्डर वाला कहां गेलई न पता हई। बीडीओ श्री कांत ठाकुर कहलथिन कि उहां पुल बहुत जल्द बनतई।
