नाम के लेल सरकारी सुविधा

एम्बुलेंस के समस्या बतबइत लोग

जिला शिवहर के सदर अस्पताल में आवे के लेल प्रसव वाली महिला के एम्बूलेन्स के सुविधा न मिल रहल हई। जेई कारण आशा सब के प्रसव वाली महिला के लावे में दिक्कत हो रहल हई।
सदर अस्पताल में आयल महिला डुमरी कटसरी प्रखण्ड के श्यामपुर भटहा के मधु देवी कहलथिन कि एम्बूलेन्स न गेलक त हम अपन चार सौ रूपईया भाड़ा लगाके अईली। मिनापुर बलहा के भोला ठाकुर कहलथिन कि चार सौ रूपईया भाड़ा अउर सूई दवाई के रूपईया भी लगलक। नर्स भी दु सौ रूपईया लेलेक। त ऐई सरकारी अस्पताल में कथी के सुविधा मिलल।
कमरौली के आशा मंजू देवी, हिरौता दुम्मा के बेबी कुमारी, मिनापुर बलहा के शांति देवी, उमेद छपड़ा के सुनिता देवी कहलथिन कि फोन करई छी त व्यस्त बतबई छई। फोन लगबो करई छई त गाड़ी खाली न रहई छई। मार्च 2014 में ही एम्बूलेन्स गेल हई। कभी बतबई छई कि कभी धून हई त कभी बारिस। बराबर कोई न कोई बहाना चलते रहई छई। जबकि इहां जेई कारण प्रसव वाली महिला न आवे चाहई छथिन।
जिला चिकित्सा पदाधिकारी मेहदी हसन कहलथिन कि यदि गाड़ी वाहन कोई बहाना बनबई छई त ओकरा जानकारी लिखित रूप से देथिन तब न हम जनबई। चाहे सूई दवाई के रूपईया ले रहल हई त ओकर भी लिखित आशा चाहे रोगी देतई तब न हम जनबई। ओकरा बाद कारवाई कयल जतई। अभी जिला में सात एम्बूलेन्स हई जे सब चालू हई कोनो गाड़ी पर प्रसव वाली महिला आ सकई छथिन।