बालादीन को खेत
जिला महोबा, ब्लाक पनवाडी, गांव सौरा। एते के बालादीन आपन चैबिस ढिसमिल जमीन की नाप कराये खे लाने चार साल से परेशान हे। लेखपाल ओर कानूनगो नाप करे खा तैयार नई होत आय।
बालादीन बताउत हे कि मोई जमीन को गाटा संख्या 987 हे। जीखी नाप खे लाने केऊ दइयां तहसील दिवस में दरखास दई हे। जीमे दो-चार दिन बाद आबी कह के टार देत हें। मोये अभे तक पता नई चलो कि लेखपाल ओर कानूनगो काय टालमटोल करत हें। मोई जमीन सड़क के किनारे हे। ईखे मारे मोये पता नई चलत की मोई जमीन किते तक हे। में चाहत हों कि लेखपाल मोई जमीन नाप देय। एईसे मेंने 21 अक्टूबर 2014 खा कुलपहाड़ तहसील दिवस में एस.डी.एम. मुहम्मद रिजवान खा दरखास दई हे। कानूनगो रामेश्वर बताउत हें कि बालादीन जानबूझ के खुद परेशान हे, ओर हम खा भी परेशान करे हे। मेंने 10 नवम्बर 2013 खा नाप करके पत्थर गड्डी भी करा दई हती। अगर बालादीन खा दुबारा नाप कराने हे तो बाद में देखो जेहे। काय से लेखपाल अभे हड़ताल में चलत हें।