जिला चित्रकूट, ब्लाक रामनगर, गांव बराछी। हिंया के वरूण नाम के औरत का आरोप हवै कि वाहिका 8 अगस्त का ससुराल वाले मिट्टी का तेल डाल के आगी लगावै के कोशिश करिन। यहिके रपट रैपुरा थाना मा लिखाइ गे पै कउनौ कारवाही नही भे।
वरूण कहिस कि मोर शादी 2014 मा अमानपुर गांव मा रहै वाले राजेन्द्र साथै भे रहै मनसावा शादी के समय दहेज नही मागिस, पै अब वा नगद दुई लाख रूपिया मांगत हवै। मोरे बाप महतारी के लगे येत्ता रूपिया नही आय कि दुइ लाख रूपिया दइ सकै। सास विमला ससुर पहलवान मारपीट करत हवै। 8 अगस्त मा मिट्टी का तेल डार के आगी लगावत रहै। मै हल्ला करेंव अउर घर के बाहर आगे रहौ नही तौ उंई आगी लगा के मार डारत।
ससुर पहलवान का कहब हवै कि वहिके साथै कउनौ मारपीट नही करत हवै। वा अपने से मिट्टी का तेल डार लिहिस रहै। हमका झूठै फंसावत हवै।
रैपुरा थाना के बड़े दरोगा साजिद अली कहिन कि रपट लिखी हवै। उनकर समझौता करवावा जई। अगर न मनिहै तौ ससुराल वालेन के खिलाफ धारा लगाई जइहै अउर कारवाही कीन जई।