बिजली की बताउत समस्या
जिला महोबा, ब्लाक चरखारी, गांव सिजौरा को मजरा बैहारी। एते जुलाई 2014 में आदमियन ने बिजली के नये कनेक्शन करवाये हते। पे अभे तक मोहल्ला में डी.पी. नई धरी हे। जीखे कारन अभे तक घरन में अंधियारो छाओ हे।
दयाराम ओर रामदुलारी ने बताओ कि हमने जुलाई 2014 के महीना में बिजली के कनेक्शन करवाये हते। जीसे हमाये घरन में भी गांव के दूसरे मोहल्ला के जेसे उजियारो होय, पे अभे तक बिजली नई आउत आय। विनोद कुमार बताउत हे कि हमाये गांव में कुल तीन डी.पी. हें। जीमें एक डी.पी. पन्द्रह दिन से फुंकी परी हे। दो डी.पी. में पूरे गांव की बिजली जलत हे। ऊ डी.पी. भी हमाये घरन से पांच सौ मीटर दूरी हे। जीखे कारन ओते से डोरी फंसा के लाये में भी खतरा हे। जभे हमने ढाई-ढाई हजार रूपइया खर्चा करके पन्द्रह कनेक्शन लये हे तो डी.पी. भी धरे खा चाही। एई से हमने 5 अगस्त 2014 खा चरखारी तहसील में दरखास दई हे।
चरखारी बिजली विभाग के जे.ई. प्रवीण कुमार बताउत हे कि बैहारी गांव में नई डी.पी. धरें खे लाने एस्टीमेट बना के महोबा भेज दओ हे। जभे एस्टीमेट पास होके आ जेहे तो ओते नई डी.पी. धरा जई जेहे। अभे हमाये एते एकऊ डी.पी. नइयां। जीसे ओते फुंकी डी.पी. खा बदल सकन, पे कोशिश करी जेहे कि जल्दी ही डी.पी. खा बदल दई जाये।