नई लगो हैण्डपम्प, लौट गई मशीन

बिहारी को खुदो परो चबूतरा

जिला महोबा, ब्लाक जैतपुर, गांव सुगिरा। एते के बिहारी राजपूत को आरोप हे कि विधायक निधि से मोये नाम हैण्डपम्प पास भओ हतो। जीखा मोहल्ले के सन्दीप तिवारी ने नई लगाउन दओ हे। बिहारी ने बताओ कि दस साल से परेशान होयें खे बाद ई साल 2014 में मोये नाम सरकारी हैण्डपम्प पास भओ हतो। जीखा लगायें  खे लाने 17 नवम्बर खा बोर मशीन आई हती। जभे मोये द्वारे के चबूतरा में मशीन चलन लगी तो मोहल्ले को सन्दीप आओ ओर गाली-गलौज कर कहन लगो कि जा हैण्डपम्प मोये खलिहान में लगहे। नई तो मशीन लौट जेहे। जा कह के ऊने सचमुच में बोर मशीन मोये द्वारे से बिना बोर करे लौटा दई। सन्दीप के चाचा चतुरसेन ने बताओ कि ऊ हैण्डपम्प हमने पास कराओ हतो। बिहारी ऊखे अपने द्वारे में लगवाउत हतो। ओते सबके निकरे की रास्ता हे। हम चाहत हें कि हैण्डपम्प एसी जगह लगे जहां सब आदमियन खा सुविधा होय। एईसे हमने मशीन लौटा दई हे।