नई मिलो रुपइया

जिला महोबा, ब्लाक जैतपुर, गांव कमालपुरा को मजरा अतरपठा। एते के पचासन आदमियन ने अगस्त 2014 में मनरेगा के तहत बन्धी चढ़ायें को काम करो हतो। जीखा रुपइया अभे तक नई मिलो आय। एईसे आदमी आपन परिवार लेके परदेश जाये की तैयारी में हें।
जयसिंह ओर रामसिंह ने बताओ कि हमने 10 अगस्त से 20 अगस्त तक रमेश खंगार की बन्धी में मिट्टी डारी हती। जीखी न खन्ती नापी गई न रुपइया मिलो हे। अरविन्द ओर नाथूराम बताउत हें कि गांव में काम नई मिलत आय। जोन काम करो गओ ऊखो रुपइया नई मिलत आय। एईसे आदमी अपने बच्चन की पढ़ाई बन्द करा के दिल्ली ओर पंजाब शहर मजदूरी करे जाये खा मजबूर हें।
प्रधान काशीप्रसाद ने बताओ कि ओते के आदमियन की खन्ती नाप के मस्टर रोल तैयार करके लखनऊ भेज दओ हे। ओतई से आदमियन के खाते में रुपइया भेजो जेहे। रुपइया समय से न मिले के कारन आदमी काम करे खा तैयार नइयां। एईसे बन्धी वालो काम अधूरा परो हे।
बी.डी.ओ. आदित्य प्रसाद पाण्डेय ने बताओ कि 10 सितम्बर खा लखनऊ से बजट आ गओ हे। जोन 11 सितम्बर खा सब मजदूरन के खाते में भेज दओ हे।