नईं गओ कोनऊं अभो तक जांच करन

जिला महोबा, ब्लाक कबरई, गांव पहरा। एते के विन्द्रवन को आरोप हे की 13 मई खा रात 8 बजे खेत के घर मे आगी लग गई हती। जीमें एक बकरी, भूसा आनाज ओर कपड़ा जल गये हते। ईखी दरखास 14 मई खा महोबा तहसील मे दरखास दई हती। जीखो मुआयना करन आज तक कोनउ नई गओ हे। मे मुआवजा के लाने तहसील ओर अधिकारियन के चक्कर लगाउत हें।
विन्द्रावन कहत हे की खेत के घर मे मताई भागवती रहत हती। ओई को एक बोरा गेंहू, कपड़ा ओर एक बकरी हती। मकान के उपर से क्रेशर की ग्यारह हजार वोल्टेज वाली बिजली की लाइन निकरी हती। 13 मई खा अचानक से आगी लग गई हती। मताई एक किलोमीटर दूर से गांव मे बताउन आई। जभे तक हम ओते पोहेचे तभे तक सब सामान जल चुको हतो। आगी लागे से लगभग पचास हजार रूपइया को सामान जरके राख हो गओ हतो। ईखी सूचना हमने सुबेरे से तहसील मे नायब तहसीलदार खा दई हती। नायब तहसीलदार ने लेखपाल बाबू खांन खा बुला के जांच के लाने आदेश भी दओ हतो। पे आज तक लेखपाल जांच के लाने नईं आओ हे। ईखी दुबरा से 24 मई खा महोबा तहसील मे दरखास दई हे।
लेखपाल बाबू खां से बात करी तो ऊने कहो की मोये जानकारी नइयां, ओर आपन फोन सुचऑफ कर लओ।

रिपोर्टर – सुनीता प्रजापति