देवर के ऊपर मारपीट करै का आरोप

जिला चित्रकूट, ब्लाक पहाड़ी, गांव कनकोटा। हिंया के गेंदी देवी का आरोप हवै कि देवर रामकुमार मारपीट करत हवै। 14 जनवरी का खूबै मारिस। यहिके रपट राजापुर थाना मा 21 जनवरी का लिखाइगे, पै सुनवाई नहीं भे।
गेंदी देवी का कहब हवै कि देवर रामकुमार पांच साल पहिले दस हजार रुपिया लइ लिहिस रहै। अब वहिसे रुपिया मांगत हौं तौ नहीं देत आय। उल्टी सीधी बात करत हवैं अउर छेड़खानी करत हवै। दारू पियत हवै अउर गाली भी देत हवैं। मोरे मनसवा संगमलाल मना करत हवै तौ वहिका मारत हवै।
देवर रामकुमार का कहब हवै कि गेंदी देवी से दस हजार रुपिया नही लीने हौं। वा झूठ कहत हवै। राजापुर थाना के मुंशी राजू विमल का कहब हवै कि रपट लिख लीन गे हवै। रामकुमार के खिलाफ अपराध संख्या 2/2015, धारा 323 (मारपीट) 504 (गाली गलौज) के    धारा लाग हवै। जांच चलत हवै।