जिला बांदा, ब्लाक बड़ोखर खुर्द, कस्बा मटौंध, मोहल्ला हरसिन थोक, वार्ड नम्बर छह। हेंया लगभग चार साल पहिले दस मरकरी लाग रही हैं। जेहिमा से एक मरकरी का छोड़ के सबै मरकरी निकल गई हैं। छह महीना से मोहल्ला वाले अंधेरे मा रहैं का मजबूर है। चेयरमैन कउनौ समस्या नहीं सुनत आय।
कस्बा के दयाराम, बच्चू, अउर नीलम कहिन कि हमरे हेंया पिछली पंचवर्षीय मा मरकरी लागी रहैं कि मोहल्ला मा उजेला रही, पै उजेला का तौ नाम तक नहीं आय। जबै मरकरी लाग रहैं तौ देखैं भर का मरकरी लाग रही हैं। अगर रात बिरात कउनौ आवत हैं तौ अंधेरे मा निकरैं का परत हैं अउर रास्ता भी खराब है तौ रात के निकरैं मा गिरै का डेर बना रहत है। यहिके खातिर कइयौ दरकी नगर पालिका मा शिकाइत कीन। आज तक बनै के नौबत नहीं आई है। यहै से हम परेशान रहत हन।
मटौंध नगर पालिका के अधिशाषी अधिकारी एन.के. मिश्रा कहिन कि हमार हेंया मटौंध कस्बा वार्ड नम्बर मा बिजली विभाग वाले सप्लाई नहीं देत न ट्रास्फारमर धरत आय। यहिके खातिर हम कइयौ दरकी बिजली विभाग मा दरखास दीन है अउर डी.एम. के मीटिंग मा भी कहा है, पै कउनौ सुनवाई नहीं आय। बांदा विद्युत वितरण खण्ड के के अधिशाषी अभियंता अशित कुमार रुहेला का कहब है-”होंआ खातिर दूसर ट्रंसफारमर धरावा जई। या काम करै मा दुई महीना लागी।”