दुर्घटना का न्यौता देत जर्जर तार

जिला चित्रकूट, ब्लाक मऊ, गांव कोलमजरा, रेलवे स्टेशन। हिंया के मड़ई कहिन कि बिजली के तार जर्जर हवैं। यहिसे कत्तौ गम्भीर घटना घटै का डेर बना रहत हवै। बिजली का तार बदलैं खातिर 22 अगस्त का लिखित दरखास दीन गे तबहूं कउनौ ध्यान नही दीन गा। हिंया के लवकुश रमेश अउर रमाशंकर का कहब हवै कि बिजली का तार जर्जर होय के कारन कउनौ समय गम्भीर हादसा होय का न्यौता देत हवै। अगस्त के महीना मा बिजली का तार टूट गा रहै तौ मड़ई बाल बाल बच गें रहैं। यहिसे सोचित हन कि बिजली का जर्जर तार बदलै का चाही, पै अबै बिजली विभाग वाले कउनौ ध्यान नहीं देत हवै। मऊ बिजली विभाग के जेई शैलेन्द्र कुमार मौर्य का कहब हवै कि कर्वी मा सरकार आदेश करी तौ बिजली का तार बदला दीन जई।