दहेज खातिर जला दिहिन

जिला चित्रकूट, ब्लाक पहाड़ी, गांव लमियारी। हिंया के श्यामबाबू के ऊपर आरोप हवै कि वा आपन औरत पूनम का दहेज खातिर जला के मार डालिस। या मामला 13 सितंबर का सउहें आवा हवै। मइके वाले राजापुर थाना मा रपट लिखा के कारवाही के मांग करिन हवै
पूनम का बाप जानकीशरण बताइस-“मोर लड़की का ससुरे वाले दहेज का लइके बहुतै मारत रहैं। तीन साल पहिले शादी करे रहौं। दहेज मा दुइ लाख रूपिया दीने रहौं तबै से श्याम बाबू के मांग बढ़त गे। कइयौ दरकी वहिके मांग पूर कीने हौं। या कारन वहिकर लालच बढ़त गा। 13 सितंबर का लड़की देखैं गये रहौं वहै दिन श्यामबाबू रूपिया मांगत रहै। रूपिया न दें मा लड़की का पहिले मार डालिस फेर मिट्टी का तेल डाल के जला दिहिस। या घटना का पता हमैं दुसरे दिन ग्यारह बजे पता चला। हम पहुंचा तौ लास कर्वी लायेंन। ससुराल वाले लास छीन लिहिन हवै।”
पूनम का ससुर शिवप्रसाद अउर सास सुन्ती कहिन कि हम कुछ नहीं जानित आय। दूनौ जन लड़ाई करिन हवैं। पूनम अपने से रात मा आगी लगा लिहिस हवै। राजापुर थाना के एस.ओ. केशव प्रसाद दुबे का कहब है कि रपट मा आठ जने के खिलाफ मुकदमा लिख गा हवै। मुकदमा मा 498ए, 304बी, आई.पी.सी. अउर 3ध्4 लाग हवैं। श्यामबाबू फरार हवै।