दहेज के ताई घर से निकारिन

जिला अम्बेडकर नगर, ब्लाक टांडा गांव छज्जापुर। हिंआ के एक मेहरारु कै आरोप बाय कि ससुराल वाले दहेज के ताई शादी के बाद से ही प्रताड़ित करत रहिन।
परमेश्वर चन्द्र जायसवाल कै बिटिया विनीता कै शादी टाण्डा थाना क्षेत्र के हयातगंज मोहल्ला मा ज्योति प्रकाश पुत्र स्वर्गीय रामलखन के साथे 1991 मा हिन्दू रीति रिवाज से भै रही। पुलिस का दिये तहरीर मा विनीता बताइन कि शादी के बाद ससुराल मा रहत के समय ही दहेज के ताई प्रताड़ित कीन जात रहा। कुछ समय बीत जाए पै गेदहरा न हुवय कै आरोप लगाइके शारीरिक अउर मानसिक रुप से प्रताड़ित करय लागिन। 2007 मा ससुराल वाले हमका मारिके सारा गहना कपड़ा छीन लिहिन। यही बीच हमार पति ज्योति प्रकाश दूसर शादी कै लिहिन। जब हमका जानकारी मिली तौ हम कोर्ट कै दरवाजा खटखटायन।
न्यायालय से जांच करायके साथे रहै कै आदेश भै। न्यायालय से आदेश भै कि कउनौ दुर्व्यहार न कीन जाए। न्यायालय के आदेश पै जब हम ससुराल आयन तौ ससुराल वाले घरमा नाय हलय दिहिन। तब कोतवाली जाइके पति व ससुराल वालेन के खिलाफ तहरीर दइके न्यायालय के आदेश कै पालन करै कै गुहार लगाइन।
टाण्डा कोतवाली कै प्रभारी बेंचू यादव बताइन कि मामला कै जानकारी बाय। जल्द ही कार्यवाही कीन जाये।