क्रान्ती
एते के बालादीन पाल की ओरत क्रान्ती ओर भनेज राजकुमारी के साथे 12 अक्टूबर 2013 सुबेरे 8 बजे राकेश, बिरेन्दर, हल्कू यादव ने मार पीट करी हे। ईखी रिपोर्ट क्रान्ति ने खरेला थाने में लिखाई हे।
क्रान्ति ने बताओ कि मोई कालोनी बनत हे जीसे मोये घर की माटी रास्ता में फेली हती। मोहल्ला की सिमिया कहत हती कि माटी हटा ले तो में कहत हती कि कालोनी बन जाये ईखे बाद माटी हटा देहों। मोओ आदमी परदेश में रहत हे ओर में घर में अकेले रहत हों 12 अक्टूबर 2013 खा जभे में रोटी बनाउत हती तभई राकेश, बिरेन्दर ओर हल्कू मोये गाली गलौज करन लगो। मेने मना करी तो चारऊ जने ने मिल के मोये साथे मारपीट करी हे। मोये बचाउन आई बहन की बिटिया राजकुमारी खा भी मारो हे।
राकेश, बिरेन्दर की मताई सिमिया ओर हल्कू ने बताओ कि ऊखी कालोनी डेढ़ महीना से बनत हे। जीसे माटी पूरे रास्ता में फेली हे। जीसे हमाओ नरदा बन्द हो गओ हे। जभे हमने माटी हटाउन खा कहो तो गाली देन लगी ओर मोये मारन लगी तभे मोये लड़कन ने गाली दई हे मारो फिर भी नइयां।
खरेला थाने के हेड कास्टेबिल प्रोन्नतिमान सुरेश चन्द्र मिश्रा बताउत हें कि धारा 323 (मारपीट) 504 (गाली गलौज लड़ाई) 506 (जान से मारने की धमकी) के तहत चारऊ के खिलाफ मुकदमा लिखो हे। ईखी जांच एस.आई. युगराज सिंह करत हंे।