तड़पत रहिगे रानू, भर्ती नहीं करिन डाक्टर

जिला बांदा, ब्लाक तिंदवारी, गांव मूगुस। हेंया के रानू 6 अप्रैल का बुखार अउर पेट दर्द के कारन तिन्दवारी के प्राथमिक स्वास्थ्य केन्द्र के बाहर तड़पत रहै। डाक्टर भर्ती नहीं करिस आय।
रानू का पति तुलसी का कहब है कि रानू का 1 अप्रैल से बुखार आवत रहै। 4 अप्रैल से टट्टी पेशाब रूक गा। वहै दिन ढाई बजे रानू का तिन्दवारी अस्पताल मा भर्ती करैं खातिर लेवा के आयेंव तौ डाक्टर न पर्चा काटिन न तौ भर्ती करिन। मेडिकल के दुकान से दर्द के दवाई लइके खवा दीनेंव। थोइ देर का आराम होइगा। रात से फेर पीरा उठी तौ 5 अउर 6 अप्रैल का लायंेव तब भी भर्ती नहीं करिन। पर्चा काट के बाहर की दवाई लिख दिहिन। मैं पांच सौ की दवाई लायेंव। एक पानी के बोतल चढ़ाइन तौ पचास रूपिया वहिमा भी लई लिहिन। डाक्टर बांदा का रिफर कई दिहिस है।
चिकित्सा अधीक्षक कपिल देव राजपूत कहिन कि रानू का दवाई लिखी गे है। दवाइन से आराम नहीं लाग तौ जिला अस्पताल का रिफर कई दीन गा है।
अपर सी.एम.ओ. ओ.पी. माहौर कहिन कि हमार डाक्टर के हिसाब से रानू भर्ती करैं लायक नहीं रही आय। या मारे वहिका रिफर कई दीन गा है।