डाक्टर बताइन खून के कमी

नीतू

चित्रकूट जिला, ब्लाक पहाड़ी, गांव प्रसिद्धपुर। हिंया के नीतू 4 जून 2014 का बच्चा पैदा करावैं पहाड़ी प्राथमिक स्वास्थ्य केन्द्र आई रहै तौ हुंवा के डाक्टर जांच करिन। जांच मा नीतू के पांच पोवाइन्ट खून बताइन अउर कहिन सोनेपुर अस्पताल लइ जाव। या फेर जानकीकुण्ड। या सुन के नीतू परेशान होइगे।
नीतू के सास रीता बताइस कि नीतू के पेट मा पीरा होत रहै। यहै से पहाड़ी प्राथमिक अस्पताल आय रहेन। हिंया के डाक्टर जांच करिन अउर पांच पोवाइन्ट खून बताइन हवै। यहै से हम परेशान होइगे हवै। नीतू के पहिल बच्चा पेट मा रहै। या सुनके अउर ज्यादा नीतू परेशान होइगे हवै। हमरे लगे मोल का खून खरीदैं खातिर रूपिया नहीं हवै। यहै से कउनौ तान कर्जा कइ के जानकीकुण्ड लइ गये रहेन।
पहाड़ी प्राथमिक स्वास्थ्य केन्द्र के स्टाप नर्स का कहब हवै कि नीतू के जांच कीन गे तौ पांच पोवाइन्ट खून निकरा हवै। यहिनतान दुइ मेहरियन के वा दिन खून के कमी मिली रहै। उनका भी कर्वी रिफर कीन गा रहै। बच्चा पैदा होय वाली मेहरियन के जउन कि दस पोवाइन्ट खून होय का चाही। या कारन जिला अस्पताल सोनेपुर का रिफर कीन गा हवै। काहे से हिंया खून चढ़ावैं के सुविधा नहीं आय।