जिला चित्रकूट, ब्लाक मऊ, गांव कोटरा खम्भा, मजरा टिटिहिरिया। पचास साल से या गांव मा एक किलोमीटर सड़क नहीं बनी आय, यहै कारन हिंया आये दिना हादसा होत रहत हवै।सड़क मा गिरे के कारन बहुतै मड़इन के हाथ-गोंड़ टूट जात हवैं। मड़ई कइयौ दरकी दरखास दिहिन हवैं पै प्रशासन सुने का तैयार नहीं आय। एडीओ पंचायत रूपनारायण का कहब हवै कि मनरेगा के तहत या काम ग्राम पंचायत करा सकत हवै।
लालजी पाल का कहब हवै कि छोट-छोट बच्चा या सड़क से निकलत हवैं तौ गिर जात हवैं, जेहिसे उनकर हाथ-गोंड़ टूट जात हवैं। मोर घर मा भी एक लड़का का हाथ टूट गा हवै। राजू दुबे का कहब हवै कि सूखे मौसम मा भी सड़क मा पानी भरा रहत हवै पै बरसात मा तौ निकरब मुश्किल होइ जात हवै। बरसात मा कउनौ बीमार पड़ जाये तौ बहुतै ज्यादा परेशानी होत हवै। रमेश बताइस कि दुइ-तीन पीढ़ी सेव या समस्या हवै। प्रधान सुनत आय, न ब्लाक प्रमुख। वोट तौ लइ लेत हवै पै काम करै का देखाई नहीं देत आहीं। मोहम्मद जावेद का कहब हवै कि हमार भारत स्वच्छ के नारा लगावत सरकार छोट-छोट गांवन मा कुछौ विकास नहीं करत आय। कमल का कहब हवै कि एसडीएम, डीएम अउर ब्लाक मा सबै जघा दरखास दीने हन पै अबै तक कारवाही नहीं भे आय।
रिपोर्टर- सुनीता देवी
Published on Jan 23, 2018
