चोरी से परेशान मड़ई

चित्रकूट जिला मा पांच ब्लाक हवैं। इं ब्लाक के गांव अउर कस्बा मा या समय लगभग चार महीना से बहुतै ज्यादा चोरी होइ चुकी हवै। पीडि़त मड़ई अगर थाना मा दरखास लिखावै जात हवैं तौ चोर का कउनौ पता नहीं लागत हवै। यहिके जवाबदेही केहिके आय।
अगर बात कीन जाये मऊ ब्लाक के गांव सेमरा मजरा पनिहाई अउर कस्बा खण्डेहा के तौ पता लागत हवै कि चोर केत्ता आंतक मचाये हवै। अब मड़ई अपने घर मा जेवर, गृहस्थी अउर रूपिया न रखिहैं तौ कहां रखैं खातिर जइहैं। का कउनौ रात भर आपन नींद हराम करी? मड़ई आपन रात दिन मेहनत मजूरी कइके रूपिया इकट्ठा करत हवैं, पै उनके कमाई एक पल मा चोरी होइ जात हवै। या बात का वहै जान सकत हवै। जेहिके ऊपर इनतान के समस्या आवत हवै। आखिर मड़ई इनतान चोरी कइके कबै तक रूपिया इकट्ठा करी। इनतान के चोरी का रूपिया कत्तौ नहीं रूकत आय। जबैकि मेहनत अउर ईमानदारी हमेशा साथ देत हवै।
पुलिस प्रशासन का भी रात मा गश्त लगावैं के जरूरत हवै। वहिका आपन जिम्मेदारी का नींकतान से निभावैं के जरूरत हवै अउर चोर का जल्दी से जल्दी पकड़ै खातिर कोशिश करब जरूरी हवै। तबहिने बढ़त चोरी के मामला थम सकत हवैं। या बात खातिर पुलिस प्रशासन का आपन ध्यान देब जरूरी हवै।