चित्रकूट जिले के चौंसठ जोगिनी देवी मंदिर में चढ़ी नरबलि

जिला चित्रकूट के पहाड़ी ब्लाक के गांव मा 4 मार्च का गला काट के बलि चढ़ावै के घटना सउहें आयी हवै। मड़इन का कहब हवै कि लोहदा गांव का रहै वाला 24 साल का बिल्लू चौसठ जोगिनी माता के मन्दिर मा गला काट के आपन बलि चढ़ा दिहिस हवै। यहिसे पहिले हिंया जीभ काटे के घटना होइ चुकी हवै। मउत का कारन अफवाह या अंधविश्वास चाहे जउन रहा होय पै एक महतारी आपन लड़का का खो दिहिस हवै।
बिल्लू के महतारी संवरिया फूट-फूट के रोवत हवै अउर आपन लड़का के बारें मा बतावत हवै कि जबै मोर लड़का सुबेरे खाना खाइस रहै, तबै मैं वहिका देखे रहिहौं, जात के दरकी नहीं देखे आहूं। मोर लड़का बहुतै सीध रहा हवै, कउनौ से मतलब नहीं राखत रहै, न कत्तौ मोरे लगे बइठत रहै। बाप फूलचन्द बताइस कि जबै पुलिस वाले फोन से बताइन हवै तबै हमें आपन लड़का के बारें मा पता चला हवै। हमार कउनौ से दुश्मनी नहीं रहि आय। भाई रमेश का कहब हवै कि हमें कुछौ पता नहीं आय कि चाकू पहिले से लिए रहा हवै कि बाद मा खरीदिस हवै। वहिका पता लगावै खातिर बारा-एक बजे से फोन लगावत रहे हन, पै कुछौ पता नहीं लागत रहा आय। पुलिस के फोन आवे माँ पता लाग तबै हम भागे हन।
ब्रजकिशोर का कहब हवै कि जबै हम घटना वाली जघा मा गये हन तौ वहिके लाश पड़ी रहि हवै। तबै 100 नम्बर अउर एसओ का फोन करे हन अउर मड़इन से लाश पहिचाने का कहा गा, काहे से वा दूसर गांव से आवा रहै।
लाला, राजेश अउर दुर्गा का कहब हवै कि यहिके पहिले भी जीभ काटे के घटना होइ चुकी हवै अउर 24 घंटा मा वहिके जीभ नींक होइगें रहै, यहै कारन मड़इन का या आदि शक्ति लागत हवै।
एएसपी बलवंत चौधरी का कहब हवै कि लोहदा गांव का रहै वाला बिल्लू गला काट के आपन आत्मबली चढ़ाइस हवै।  

रिपोर्टर- नाजनी रिजवी

Published on Mar 7, 2018