चालीस घर में जनगणना न

जनगणना से वंचित लोग

जिला सीतामढ़ी, प्रखण्ड सोनबरसा, पंचायत, गांव जयनगर मुशहरी टोला। उहां 2014 में आर्थिक समाजिक जनगणना के दौरान चालीस लोग के घर के जनगणना न भेलई। जेईसे उ सब भूखमरी के कगार पर छथिन।
मुशहरी बस्ती के लोग कैलशिया देवी, दुःखा माझी, सुलेखा देवी कहलथिन कि लोग कहई छई कि महादलित पर सरकार बहुत ध्यान देई छथिन। लेकिन उहां हम सब जनई छी कि हमरा सब के केतना लाभ से वचित रखल जाई छई। अभी अतेक लोग के घर में जनगणना भेलई लेकिन हमरा घर में आॅपरेटर न अलथिन। त हम सब प्रखण्ड में बी.डी.ओ. के पास आवेदन देली कि हमरा सब के भी जनगणना होये के चाही। लेकिन कहां कोई सुनवाई भेलई। हम सब कहीं के न छी। हमरा सब के राशन कार्ड भी न हई।
मुखिया किरण देवी कहलथिन कि इ त बहुत बड़ा गलती हई। हम सब जनता दरवार में भी मुशहर बस्ती के जनगणना के सूचना देले रही लेकिन कोई कारवाई न भेलई। उ सब गरीब आदमी हई कभी उनका सब के खाना भी न रहई छई।
बी.डी.ओ. रितेश कुमार अउर जनगणना प्रभारी सुशील कुमार सिंह कहलथिन कि जेकर जनगणना छुट गेलई ओई पर अभी कोई काम न हो रहल हई। जिकर जनगणना भेल हई। कुल गरबड़ी भेल रहई जेई पर आपति फाॅर्म जमा कयल गेल रहई ओई पर राज्य से टीम आयल हई जांच चल रहल हई।