एसी गन्दगी में रहत आदमी
जिला महोबा, ब्लाक पनवाड़ी, कस्बा पनवाड़ी। एते के तिवारी मुहल्ला वार्ड नम्बर एक ओर वार्ड नम्बर दो में लगभग एक साल से कूड़ा एकट्ठो लगो हे। जीखा फेकवाये खे लाने प्रधान कोनऊ ध्यान नई देत आय।
भगवती, माया ओर सुमन ने बताओ के हमाए घर के बगल में कूड़ा फेंके खे लाने प्रधान ने जगह तो बना दई हे, पे एक साल से कूड़ा फेंकवाये खा नाम नई लेत आय। हमाये घर के सामने इत्ती गन्दगी रहत हे कि मच्छरन की भरमार हे। मच्छर काटे कोनऊ न कोनऊ बीमारी बनी रहत हे। अगर तनकऊ पानी बरस जात तो भीतर बाहर एक सो हो जात हे। ई कूड़ा फेंकवाये खे लाने प्रधान से केऊ दइया कहो कि जा कूड़ा फेंकवा देय, पे ऊ नई सुनत आय। हम तो परेशानई रहत हें, पे हमाये बच्चन खे तो मुसीबत हे। काय से ऊ कूडा़ के मारे खेले ते नई पाउत आय।
प्रधान आशाराम ने बताओ कि ओते को कूड़ा हर महीना फेंकवाओ जात हे। अभे त्यौहार में कूड़ा फेंकवाओ हे। जोन कूड़ा बचो हे ऊखे भी जल्दी फेंकवा दओ जेहे।