गन्दगी से भरी बजबजात नाली बीमारी का बना डेर

जिला बांदा, ब्लाक तिन्दवारी, गांव बरेठीकलां अउर बांदा शहर का मोहल्ला निम्नीपार। इं दूनौ गांव अउर शहर मा कूड़ा से जाम नाली बजबजात है अउर जघा-जघा कूड़ा के ढेर लाग हैं। यहै कारन है कि दिनै दिन बीमारी बढ़त हैं, पै सफाई कर्मी अउर विभाग का या बात के कउनौ चिन्ता निहाय।
बरेठी गांव के शिवप्रसाद अउर कामता बताइन कि उनके गांव मा चार महीना से सफाई नहीं भे आय। रामऔतार का कहब है कि सरकार स्वच्छ भारत अभियान के तहत गांवन अउर शहरन का गन्दगी से बचावैं का उपाय तौ सोचिस रहै, पै सच्चाई का है या नहीं देखिस आय। गांवन मा सफाई कर्मी आवत हैं अउर प्रधान के दुआरन मा हाजरी बजा के चले जात हैं। या गन्दगी का शिकार तौ गांव मा रहैं वाली आम जनता झेलत है। गन्दगी के कारन बहुतै मच्छर लागत हैं। जेहिसे दुआरे मा बइठब मुश्किल है अउर बीमारी फइलत हैं।
सफाई कर्मी सत्य नारायण का कहब है कि दुई हप्ता विकाश भवन मा डियूटी लाग रही है अउर एक हप्ता तिन्दवारी ब्लाक मा यहिसे गांव के सफाई नहीं होई पाई आय। चार महीना से सफाई ना होय का लोग झाुठ आरोप लगवत हैं।
बांदा शहर निम्नीपार के सुनीता, रामबाबू अउर राजेश बताइन कि उनके हेंया भी सफाई नहीं होत। या कारन गन्दगी के मारे नाली मा कीड़ा पर गे हैं। यहिसे बहुतै मच्छर लागत है अउर घर से बाहर बइठब मुश्किल है। मच्छरन के काटैं से बहुतै बीमारी फइलत है। यहिसे हम लोगन का बहुतै डेर बना रहत है। हम लोग कइयौ दरकी नगर पलिका मा सफाई के मांग कीन, पै कउनौ सुनाई निहाय।
नगर पलिका के सफाई इस्पेक्टर हरी शंकर का कहब है कि सफाई करमचारी तौ जात हैं पै अगर नाली के सफाई नहीं करत वहिसे कहिके करवा दीन जई।