कोटेदार के करिन शिकायत

जिला चित्रकूट, ब्लाक कर्वी, गांव कहेटामाफी। हिंया के मड़इन का अरोप हवै कि गांव का कोटेदार चुन्नू ए.पी.एल कार्ड वालेन का मिट्टी का तेल चार महीना से नहीं दिहिस। यहै से मड़ई 13 अक्टूबर 2014 का एस.डी.एम. नरेन्द्र सिंह का लिखित दरखास दिहिन उंई कारवाही का भरोसा दिहिन हवैं।
गांव के होरीलाल का कहब हवै कि लगभग आठ साल से कोटेदार चुन्नू कोटा लीने हवै। अब वा चार महीना से मिट्टी का तेल नहीं बांटत हवै। यहै से मिट्टी का तेल बाजार से चालिस रूपिया लीटर खरीदैं का परत हवै।
जिला पूर्ति विभाग के बाबू अवधेश का कहब हवै कि कोटेदार चुन्नू के जांच कीन जई कि वा मिट्टी का तेल समय से काहे नहीं वितरण करत हवै।
कर्वी एस.डी.एम. नरेन्द्र सिंह कहिन कि 14 अक्टूबर 2014 का गांव मा चैपाल लगाई गे रहै। यहिमा पता लाग कि कोटेदार मिट्टी का तेल ए.पी.एल वालेन का नहीं बांटत हवै। कोटेदार चुन्नू के जांच चलत हवै। जांच मा सही पावा जई तौ कोटा रद्द होइ सकत हवै।
कोटेदार चुन्नू कहिस कि मड़ई पीछे लाग हवंै। उंई मोर कोटा रद्द करावैं चाहत हवैं। मैं हर महीना मिट्टी का तेल सबहिन का देत हौं। मड़ई यहिनतान कहत हवंै।