का अबै तक विभाग बेखबर रहै

उत्तर प्रदेश के बुन्देलखण्ड  इलाका मा शिक्षा के स्थिति बहुतै खराब हवै। या शिक्षा के खराब स्थिति तबै सउहें आगे जबै कर्वी ब्लाक, गांव रैपुरवामाफी के प्राथमिक अउर पूर्व माध्यमिक स्कूल मा करंट उतर आवा।
लगभग बीस साल से दूनौ स्कूल के भीतर ज्वाइंट मा बिजली का ट्रांस्फारमर लाग हवै। का या ट्रांसफारमर लगवावैं के समय बिजली विभाग वालेन का या बात का ध्यान नहीं रहै कि हिंया स्कूल हवै तौ कत्तो करंट न आ जाये। आखिर एक दिन यहै भा कि दूनौ स्कूलन मा करंट आवै से बच्चन अउर मास्टरन के जान बहुतै बच गे। सरकार हर क्षेत्र मा सुधार करत हवै, पै शिक्षा से जुड़ी समस्यन का सुधारै मा हमेशा नाकाम रहत हवै।
सरकार या बात का ध्यान काहे नहीं देत हवै कि सबसे पहिले शिक्षा से जुड़ी समस्यन का समाधान करै का हवै। अगर यहिनतान के समस्या रैपुरवामाफी गांव के प्राथमिक अउर पूर्व माध्यमिक स्कूल मा बनी रही तौ कउनौ समय बड़ा हादसा घटै का डेर बना रही। बच्चा तौ आवै वाले भविष्य के कुंजी हवै। यहिसे अगर उनके समस्या का समाधान कीन जा सकत हवै तौ हर क्षेत्र मा सबहिन से नींक शिक्षा का स्तर होइ सकत हवै।
या बात का ध्यान देब मास्टर अउर सरकार दूनौ के जिम्मेदारी बनत हवै। तबहिने बच्चा अउर साक्षर होइ सकत हवै । घटना होय से पहिले शिक्षा विभाग अउर बिजली विभाग का स्कूल के भीतर से बिजली का ट्रांसफारमर  हटवा दें के जरुरत रहै।