चरखारी की कांशीराम कालानी
जिला महोबा, ब्लाक चरखारी, कस्बा चरखारी, कांशीराम कालानी। एते एक हफ्ता से पानी की सप्लाई बन्द हे। जीखे कारन एते के आदमी पानी खे लाने एते-ओते भटकत हें।
ब्लाक 15 के नारायण ओर इकबाल बताउत हें कि हमखा कालोनी में रहत डेढ़ साल हो गये। ओते हम कोनऊ न कोनऊ समस्या से हमेशा जूझत रहत हें। अभे एक हफ्ता से ऊपर होय जात हें। जल संस्थान वाले पानी सप्लाई नई करत आय। पप्पू अहमद बताउत हें कि सुबेरे 6 बजे से 6.30 बजे तक पानी सप्लाई होत हे। चाहे कोनऊ पानी भर पाये चाहे नई। अब ऊ आधे घन्टे की सप्लाई भी बन्द हो गई हे।
चरखारी इकाई जल संस्थान के बाबू महमूद हसन ने बताओ कि ओते पानी सप्लाई की जिम्मेदारी महोबा जल निगम की आय।
महोबा शहर, हमीरपुर चुंगी कांषीराम कालोनी। ब्लाक नम्बर 6 के रहे वाले हरिश्चन्द्र ओर प्रेम सिंह ने बताओ कि सरकार ने रहे के लाने कालोनी दई हे, ओर देखे खा बिजली पानी जेसी सुविधा कर दई हे, पे ंसुविधा को कित्तो लाभ मिलत हे। जा कोनऊ अधिकारी ध्यान नई देत हे।
सुनील साहू बताउत हे कि पानी खा टंकी तो बनी हे, पे एक महीना से एकऊ पानी नई आउत हे। 2 इंची पाइप लाइन परी हे। जीसे पानी पूरी मात्रा में नई पोंहच पाउत हे। टंकी भी बंद हे हम लोगन खा हैण्डपम्प से पानी भर के तीन-तीन मंजिल ऊपर जाने परत हे। बर्तन लेके ऊपर जात हें तो चक्कर आउन लगत हे। सोंचत हें तनकऊ पांव फिसल जाये तो गिर खे तरे आबी। अगर 4 इंची पाइप पर जाये ंतो पानी आउन लगे। ईखे लाने हमने केऊ दइयां जल निगम ओर तहसील दिवस में भी दरखास दई हे, पे विभाग वाले हाथ में हाथ धरे बेठे हें। एई कारन से अभे तक कोनऊ सुनवाई नई भई आय।
महोबा सिविल जल संस्थान के सहायक अभियन्ता आर.के. मिश्रा ने बताओ कि ओते की पाइप लाइन की जांच कराई जेहे। जांच कराये में अगर पाइप खे जरूरत होहे तो पाइप जरूर डरवाये जेहे।