करिस छेड़खानी

जिला चित्रकूट, ब्लाक कर्वी का एक गांव। हिंया के एक औरत का आरोप हवै कि 29 अगस्त का मध्य प्रदेश, सतना जिला के गांव फतेहपुर का रहैं वाला हनुमत छेड़खानी करिस। यहिके रपट रैपुरा थाना मा लिखाइगे।
गांव के एक औरत का कहब हवै कि 29 अगस्त का रक्षा बंधन के त्यौहार मा अपने मइके पहाड़ी ब्लाक, गांव उन्नाय बन्ना के पुरवा बघरवार अपने दुइ बच्चन साथै जात रहौं। सून-सान रास्ता मा हनुमत मिला अउर वा आ के मोरे साथै छेड़खानी करैं लाग। मैं हल्ला करेंव तौ पुरवा के मड़ई आ के बचाइन हवैं अउर हनुमत का पुलिस के हवाले कइ दिहिन।
रैपुरा थाना के बडे़ दरोगा साजिद अली का कहब हवै कि हनुमत का जेल भेज दीन गा हवै। वहिके खिलाफ 354(लज्जा भंग करब) धारा लाग हवै।