कभे हो हे पिये के पानी कि परेशानी दूर

जिला महोबा। गर्मी खा मौसम अउते ही एते के आदमी पियें के बूंद-बूंद पानी खा तरसत हे। गांवन के जोन हैंण्डपम्प हे ऊ बिगरें परे हे जा फिर जमीनी जल स्तर के घट जाय से पानी नईं निकरत हे।
ब्लाक चरखारी, गांव नोसरा, मजरा बम्नेथा। एते कि गिरजारानी, विद्यारानी, आशारानी ओर रामप्यारी कहत हे की हमाये एते के हैण्डपम्प दो महीना से खराब परे हें। जीसे 60 घर को परिवार ऐसी तपिश भरी गर्मी में पानी खा बोहतई परेशान हे। हम लोगन खा डेढ किलो मीटर दूरी से पानी ले जाने परत हे। इसे हमाये घर के काम खा भी बोहतई नुक्शान हे। प्रधान हैण्डपम्प बनवाये खा नाम नई लेत हे।
प्रधान कमलेश राजपुत कहत हे कि हैण्डपम्प बिगरें कि मोखा जानकारी नई रही हे। अब भई हे तो बनवा दओ जेहे।
ब्लाक पनवाडी, गांव बगोवल, मजरा चमरूवा, मोहल्ला वरियन। एते को मुन्ना आंर रामसजीवन कहत हे कि हमाये एते को हैण्डपम्प भी तीन महीना से खराब हे। इसे हम पचास लोगन खा पानी कि दिक्कत हे। प्रधान रामसरन कहत हे कि सुधरा दओ जेहे। ब्लाक जैतपुर, गांव मढरी ओर कोडई। एते के मुन्ना ओर ब्रजलाल बताउत हे कि हमाये एते पानी खे तरस में आदमी तो परेशान हे,पे साथ में जानवरन ओर पशू पक्षी भी मरे जात हें, पे अधिकारी रोड से चले में भी इ गांव कि समस्या देखें के लाने आंख कान बंद कर लेत हे ओर कोनउ ध्यान नई देत हे।
कुलपहाड़ तहसीलदार रामजी कहत हे कि ऊ गांव में प्रधान से कहे के चरही कि व्यवस्था करवा दई जेहे ओर हम पानी के लाने कछु नई कर सकत हें।