खाली परी कांशीराम कालोनी
जिला महोबा, ब्लाक जैतपुर, कस्बा कुलपहाड़। एते कांशीराम कालोनी तो देखे खा बनी हे, पे अभे तक एकऊ आदमियन खा कालोनी नई मिली हे। जभे कि पात्र आदमी कालोनी पाये खा भटकत हे।
किशोरगंज मोहल्ला की पुनियां ओर हरी बताउत हे कि हम पांवन से विकलांग होय खे कारन बैषाखी लेके चलत हें। जीसे हम कछू काम नई कर पाउत हें। हम आपन घर केसे बनवा पेबी। काय से हम खुद दूसरे खे आसरे में हें। एई से हमने नगर पंचायत में जा के खाली परी कांशीराम कालोनी की मांग करी हे, तो ओते के अधिकारी कहत हें कि अभे कोनऊ खा कालोनी न दई जेहे। संतोषी कहत हे कि गरीब आदमियन खे कालोनी के फारम नई भरे जात हें। जीखे पक्के घर ओर ऊपर तक पोंहोंच हे ओई खा कालोनी मिलहे।
कुलपहाड़ नगर पंचायत के अधिशाषी अधिकारी राजकुमार उपाध्याय ने बताओ कि कांशीराम कालोनी जिला नगरी विकास महोबा से बनी हे। एक महीना से ईखा सर्वे चलत हे। सर्वे में जोन गरीब ओर पात्र आदमी होहे, ओई खा कालोनी दई जेहे।