कभे पोहोचहे गांवन मे बिजली

केन्द्र सरकार ने गांवन मे उजाला के लाने करोड़ो रूपइया खर्चा करके राजीव गांधी विद्युत योजना लागू करी हती। जीसे गांवन की जनता अंधेरे मे न रहे। पे ई योजना बोहतई कम देखे खा मिलत हे। गांव मे बिजली के खम्भा ओर तार तो फेली हे पे अभे तक बिजली चालू नई भई हे। आदमियन की पीढ़ी दर पीढ़ी गुजरत जात हे। पे गांवन से अधियारो दूर नई होत हे।
हम बात करत हे कबरई ब्लाक के घण्डूआ, खरका ओर खन्ना गांव की ई गांवन में आज भी आदमी उजियारे खा तरसत हे। जभे की उजियारे खा आदमी के जीवन से जोड़ो जात हे। ई गांवन मे शोभा बढ़ायें के लाने तार खम्भा तो लगवा दये हे।
सवाल जा उठत हे कि का तार खम्भा लागे भर से योजना सफल हो जेहे। का गांवन में शोभा बढ़ायें के लाने अधूरो काम कराओ जात हे जा ऊ योजना के तहत लागू बजट खा बंदरबाट करो जात हे। का सरकार अधूरो काम करे के लाने बजट भेजत हे।