ई खेत के पानी में मिली लाश
जिला महोबा, ब्लाक कबरई, कस्बा कबरई, झलकारी बाई मोहल्ला। एते के अजीत के तीन लड़कन की लास 16 मई 2014 खा खेत के गड्ढा के पानी में मिली हे। जीसे पूरे कस्बा में सनसनी को माहोल छाओ हे। ऊखो आरोप हे कि कोनऊ ने ऊखे तीनऊ लड़कन खा मार के दुश्मनी निभाई हे। पे ई बात खा कबरई थाने के पुलिस प्रसाशेन नई मानत हे।
अजीत की ओरत फातमा ने कहो कि दो साल पेहले मोहल्ला के बरदानी प्रजापति ओर भवानीदीन साहू से लड़ाई भई हती। मोए तीन लड़का हते। अकील 14 साल को अफजल 8 साल को ओर लकी 6 साल कों हतो। तीनऊ लड़का 16 मई 2014 खा शाम 5 बजे तक खेलत रहे हे। ऊखे बाद लड़कन खा पता नई चलो कि ऊ किते खा गए हें। जभे शाम के घर नई आये तो हमें चिन्ता हुई। हमने लड़कन खा पूरी रात ढूढ़ो, पे कहूं पता नई चलो। जभे हमने सुबेरे कबरई थाना में सूचना दई। पुलिस आई ऊ भी ढूढ़न लगी। तभई अचानक से सूचना मिली, कि कोनऊ लड़का खेत में भरो पानी में परो हे। ओते जाके देखो तो अकील को थोई मुंह दिखात हतो। आदमी बांस लेके हेले तो तीनऊ लड़कन की लास ओतई मिली हे। मोए लड़का कभऊं खेत ओर तालाब नई गए हे। एई से हमें लगत कि हमाये लड़कन खा पकर के सबेरे मार के पानी में फेंक दओ हे। जभे लास पानी से निकारी तो ऊखे मुंह ओर नाक से खून निकरत हतो। अब मोओ दिया बुझा गओ किखे सहारे जिहों।
कबरई थाना के एस.ओ. रामकेवल पटेल ने कहो कि अजीत की दरखास आई हे। पोस्टमार्टम रिपोर्ट में पानी के डूबे से मोत भई हे। मछली के काटे से लड़कन के खून निकरत हतो। एई से हम ऊमें कछू कारवाही नई कर सकत हें।