एक-एक बाल्टी पानी खा बेठत

जिला महोबा, ब्लाक चरखारी, कस्बा खरेला। सूखा के कारन पानी को जल स्तर रोज को रोज नीचे गिरत जात हे। पाइप लाइन टूटी होंय के कारन एते पन्द्रह दिन से पिये को पानी नई आउत हे। आदमी एक-एक बाल्टी पानी बेठे रहत हे। जीखे लाने विभाग भी कोनऊ ध्यान नईं देत हे।
मेवालाल गुप्ता, व्यापार मण्डल को अध्यक्ष राजू गुप्ता बताउत हे की हमाये एते के पानी की लाइन पन्द्रह दिन से टूटी परी हे। हम लोग एक किलोमीटर दूर से पानी लाउत हे। हम लोग एक-एक बाल्टी के लाने घण्टन बेठे रहत हे। हैण्डपम्प खराब परो हे जोन सही हे ऊखो पानी बोहतई खारा हे। जोन पी नई सकत हे।
सतीश गुप्ता ओर सुशील गुप्ता कहत हे की पानी के बिना कोनऊ काम नई होत हे। पाइप लाइन टूटी परी हे। एते पानी बोहत ई परेशानी हे। जल संस्थान वाले कोनऊ ध्यान नईं देत हे। हर महीना सौ रूपइया पानी को बिल भेजत हे। जभे पानी नईं आउत हे बिल काय खे भरन। अगर बिल नईं भरत हे तो द्वारें में आके लड़ाई झगड़ा करत हे। पानी की सूचना हमने केऊ दइयां जल संस्थान में दई हे की पाइप लाइन खराब हे। पानी नई आउत हे। पे कोनऊ ध्यान नई देत हे।
जल संस्थान के एस.के. वर्मा कहत हे की अभे तक हमाये एते एसी कोनऊ दरखास ओर सूचना नईं आई हे। अगर आई होती जरूर पाइप लाइन बनवा दई जाती। अभे पता चलो हे जल्दी ही बनवा दई जेहे।