उखड़ी परी सड़क, आये दिन बिगरत साधन

सड़क को जा हाल

जिला महोबा, ब्लाक कबरई कस्बा कबरई। एते से लेके कुन्हेटा तक लगभग छत्तीस किलो मीटर सड़क हे। जोन डेढ़ साल से खराब हे। जीसे आय दिन साधन खराब होत हे। ओर कोनऊ भी भयंकर घटना होय को डर बनो रहत हे, पे जा सड़क बनवायें खा कोनऊ नाम नई लेत आय।
आटो चलाये वाले संजू, लाखन यादव, महेश, धरमपाल ने बताओ कि कबरई कस्बा से लेके सिधनपुर बघारी गांव तक सड़क बोहतई खराब हे। जा सड़क प्रधानमंत्री ग्राम सड़क योजना के तहत बनी हती। जोन डेढ़ साल से उखरी परी हे। ई सड़क से छोट बड़े हजारन साधन निकरत हंे। ई रास्ता में सबसे ज्यादा ट्रक चलत हें। जीखे कारन सड़क में बड़े-बड़े गड्ढा हो गये हें।
अजय, ओर चुन्ना ने बताओ कि हम आटो चलाउत हें। ई सड़क में आये दिन गाड़ी खराब हो जात हे तो जित्ती कमाई नई होत उत्ती गमाई हो जात हे। हम गरीब आदमी आटो चला के परिवार पालत हंे। एईसे हम चाहत हें कि जा सड़क बन जाये तो नींक हो जेहे।
प्रधानमंत्री ग्राम सड़क योजना विभाग के बड़े बाबू दरबारी लाल ने बताओ कि उ सड़क के लाने ठेकेदार नई मिलो हे। 10 प्रतिशत सिकोटी सरकार के खाता में जमा है। चार महीना पेहले सड़क का प्रस्ताव बना के भेज दओ हे। जेसई बजट आ जेहे तो सड़क में काम चालू करा दओ जेहे।